⭕️ زرنیشان خانێـمین چنلی‌بئله گلمه‌سی ✍️ کؤچۆرن: #شبنم_توحیدی بیرینجی بؤلۆم بلی، استاد دیلی موبارک…

⭕️ زرنیشان خانێـمین چنلی‌بئله گلمه‌سی ✍️ کؤچۆرن: #شبنم_توحیدی بیرینجی بؤلۆم بلی، استاد دیلی موبارک اوْلار. ایندی سیزه هاردان خبر وئریم، کیمدن خبر وئریم، چارداخلی چنلی‌بئلده قوْچ کوْراوغلودان. کوْراوغلونون کئفی کؤک، داماغێ چاغ ایدی. اوْغوللارێ ائیوازلا، حسن ساغ­ – سوْلوندا قوْلونا قوّت، دیزینه طاقت، گؤزۆنه اێشیق ایدی.­حسن داغێستان‌دان گلندن سوْنرا ائله بیل چنلی‌بئلین زینتی بیره – بئش آرتمێشدی.حسن مشقلری أن چوْخ دمیرچی‌اوْغلو ایله ائدیردی. حسن‌ین آت مینمه‌سی، یَـهرده شاهین کیمی اوْتورماسێ، توْپپوز ائندیرمه‌سی، کوْراوغلونو غرورلاندێریردی. کوْراوغلو، نیگار خانێملا مشقه باخێردی. مشقدن سوْنرا ائیوازلا حسن، نیگار خانێمین یانێنا گلدیلر. ایلک آنالارێـنا باش اڲدیلر، سوْنرا آت‌لارێ‌نین قارشێسیندا امره منتظر دایاندێلار. کوْراوغلو عارف آدام ایدی. درحال ایشی باشا دۆشدو، نیگار خانێمین اۆزونه باخدێ. نیگار خانێم کوْراوغلونون غم دریاسێنا غرق اوْلدوغونو گؤرۆب، گؤزۆنو اطرافێـنا گزدیردی. جمعی چنلی‌بئل دلی‌لری اوْنلارێ ائله قوْمارالامێشدیلار کی، ائله بیل هامێ نیگار خانێمدان بیر "هه" جوابێ گؤزله­‌ییرلر. نیگار خانێم الینی – الینه ووردو. دلی‌لرین نعره‌سیندن یئر – گؤڲ لرزه­‌یه دۆشدو. چنلی‌بئلده بیر مجلیس قورولدو کی، روزگارێن گؤزۆ هله بئله شادیانالێق گؤرمه‌میشدی. دلی مئهتر دورآتێ، عرب‌آتێ میدانا گتیردی. ائیوازلا، حسن آلتدان گئیینیب اۆستدن، اۆستدن گئیینیب آلتدان قێفیل‌لاندیلار. ائیواز دورآتـێن، حسن عرب‌آتـێن قان‌تارغێ‌سینی برکیتدی. بیر گؤز قێرپیمیندا آیاقلارێنی اۆزنگی­یه قوْیوب، قێرغی کیمی یـهره اڲلشدیلر. مجلیسین دؤره­‌سینده گردیش ائدیب، کوْراوغلو ایله نیگار خانێمدان حلاللێق دیله‌دیلر. نیگار خانێم اوْغوللارێ‌نین سفرینه بیر سؤز دئمه­‌سه ده، یاز بولودو کیمی دوْلموشدو. ایره‌لی یئریدی، حلاللێق ائدیب، اجازه وئردی. دورآت‌لا، عرب‌آت نیگار خانێمین سؤزۆنه بند ایمیش کیمی شیهه چکدیلر، داغیستانا یؤن آلدێلار. سَفرین اۆچونجو گۆنو شن­لیک چێراق‌لارینی یاندێران واختێندا، جۆت قارداشلار آغ‌قایانێن قارتالێ کیمی، دمیرقاپێ دربندده «عرب پاشا»نێن حیطینده آتـدان ائندیلر. «مؤمینه خانێم­»ین اوْغلو حسن، گئدندن سوْنرا گؤزلری‌نین قوْراسێنی او قدر سێخمیشدی کی، جانێـندا جان، دیزینده طاقت قالمامێشدی. سارالێب ساپا، اینجه‌لیب ایـپه دؤنۆشموشدو. زیل قارانلێـقدا اوْغلونون سسینی تانێـسا دا، حیطده دایانانلاردان هانسێ‌نین اوْغلو اوْلدوغونو آنشێـرا بیلمه‌دی. ائیوازی باغرێـنا باسێب، دوز کیمی یالادێ. دئدی:- دوْققوز آی، دوْققوز گۆن، دوْققوز ساعات، دوْققوز ثانیه عذاب اذیتـینی چکدیڲیم، یۆڲورویونون باشێنی کسدیڲیم دیره­‌ڲـیم – دیله­‌ڲـیم اوْغول، آدام دا آناسێنی گؤزۆ یاشلێ قوْیارمێ؟ سن گئدندن سوْنرا اختیار بابانێ، آتانێن دشمنلری اؤلدۆردولر. گؤزلریم سنی آختاردێ، اوْغول – اوْغول دئمکدن دیلیم دۆڲون باغلادێ. ائیوازلا، حسن، مؤمینه خانێمین قوْلونا گیریب ایچری کئچدیلر. مؤمینه خانێم، اوْغلونو چێراغین اێشیغیندا تانێدی. آنا – بالا یاز سارماشێغی کیمی بیر مدّت بیر بیرینه سارێشدیلار. گؤز گرک ایدی، بو صحنه­‌نی اوْخشایێـب تماشا ائده­یدی. گئجه­‌دن خیلی کئچندن سوْنرا ائیواز مطلبین اۆستونه گلدی. دئدی:- آناجان! آتا – آنامێز سنی چنلی‌بئلده جمعی دلی‌لرین، خانێملارین آغ‌بیرچـڲی گؤرمک ایسته­‌ییرلر. اؤزۆن اۆچون نه عزیزدی خزینه­‌دن گؤتۆر، اختیارێـندادی. صحبت اوزاندێ. ائیواز دوروب دورآت‌لا، عرب‌آتێ یئمله‌دی. دان یئری سؤکۆلنده ائیوازلا، حسن یاتاقلارێنا اوزاندێلار. او یاتان اۆچ گون، اۆچ گئجه یاتدێلار. آیێلاندا گؤردۆلر کی، مؤمینه خانێم ائله دڲیشیب، گؤز ایسته­‌ییر تاماشا ائتسین! بو اۆچ گۆنده ائله بیل مؤمینه خانێمین بۆتون گنجلیڲینی اؤزۆنه قایتارمێشدیلار. رنگی یالاف – یالاف یانێر، آی خجالتیندن اۆزونو بۆروموش، گۆن اوتاندێغیندان بولودلارێن آرخاسێنا کئچمیشدی. زربافت‌لی قێرچین دوْن، مؤمینه خانێما ائله یاراشێردی کی، ائله بیل جمعی حوری‌لر اوْنون قارشێسیندا حسابا دوراجاقدێ. ائیوازلا، حسن توْققانێن آلتێنی برکیتدیلر. ائیواز دئدی:- آناجان! یوْلچو یوْلوندا گرک! وعده­‌یه ناخلف­لیک ایڲیده یاراشماز. مؤمینه خانێم چکی­ده یۆنگول، وزنده آغێر خزینه‌دن نه وارسا یۆکونو توتوب، قاطێرلارا یۆک ووردوردو. مال ساغێنی واختی قاطێرلار، «عرب پاشا»نێن منزیلیندن قالخدێ. حسن اوشاقلێق دوْستو، دمیرقاپێ دربندده ایڲیدلیکده، سخاوتده آد قازانان یـهر اوستاسێ فتحعلی‌نی چاغێرتدی. دمیرقاپێ دربندین خانلێغینی اوْنا حواله ائدیب، جماعتین دوْلانێشیغینی اوْنا تاپشێردی. #آردێ_گلن_سایێدا... @SancaqDergisihttps://t.me/Sancaq_media/8313