«#سانجاق»، سیاسی- اجتماعی مهد تمدن گۆنده‌لیگی‌نین ۲۸۱۳. سایێنداکی تۆرکجه صفحه‌«مونجوق» صفحه‌سی، تۆر…

⭕️ خیاو آرپاسێ ✍️ یازان: #غلامرضا_گل‌نظری غلامحسین دئدی:- «دای اوْغلو! اوْ قاباخداکی بوْز آتـلی‌نی ائندیر یئره، چوْخ بێـرنی یئللی‌دیر!»دئدیم:- کیشی! مگر بیز آدام اؤلدۆرمڲه گلمیشیک؟ وار – یوْخدا اوْن دؤرد گۆلله‌میز وار . بوْز آتلی کیشی بیزده تسلیم نشانه‌سی گؤرمه‌ییب، بیر ایکی گۆلله، من گیزلندیڲیم داشا وێردی! من ده بیزده اوْدلو سیلاح اوْلدوغون، بیرده کسکین نشانچێ اوْلدوغومو گؤسترمک اۆچون، آتێـن آیاغێ‌نین آلتێـنا بیر گۆلله وێـردیم.شاهسونـلر داشلارێن دالێـنا سێغینیب، یئنه تهدید ائتمڲه باشلادێلار . بو مهلکه‌دن نئجه قورتارماغا فکرلشیردیم کی، بیردن بیره  اوجا بوْی، باشدا دری پاپاخ، سیلاح‌سێز بیر کیشی، دۆز اۆزبه‌اۆز، قارشێما چێخدی! دقّتله منه باخێب، دئدی:ـ «حاجێ غلام! سنسن؟»سوْنرا اوْغرولارا اۆز توتوب، قێـشقیردی:- «جهنم اوْلون! اوتانمێرسیز منیم دوْستومو سوْیورسوز؟ ایتین گؤزۆمون قاباغێندان آج یوْلسوزلار!» آتلێ‌لار درحال گؤزدن ایتدیلر! سوْنرا آتدان آشاغا دۆشوب، منی قوجاقلایێب، دئدی:- « سن هارا، بورا هارا کیشی؟ منی تانێـیرسان یا یوْخ؟ یادێـنا گلیر آوارسا ایستی سویا، چیممه‌ڲه گلمیشدیم. آخشام منی قوْناق آپارێب خوْروز کسیب، اریشته پیلوْوو پیشیتدیردین؟ اوْ سوْیوق گئجه هئچ یادێمدان چێخماز!منه «قوْتاز بڲ» دییرلر. یئددی اوْبانێـن بـڲی منم، سیزه اڲری باخانێـن گؤزۆن چێخاردارام.»  قوْتازبڲ بیزیمله «رازلێـق» کندینه قدر گلیب، حتی حسن قهوه‌خاناسێندا چای – قلیان و ناهارا دا  بیزی قوْناق ائدیب، خداحافظلشیب گئتدی. 🔶 آچێقلاما؛ «آوارس» بیزیم کندین آدێ‌دیر. رسمی آدێ «آبرس»دیر. ساراب شهری‌نین قوزئیینده یئرلشن یام‌ - یاشێل بیر کنددیر. (۶-۷ کیلومتر) #سون @SancaqDergisihttps://t.me/Sancaq_media/8363

⭕️ خیاو آرپاسێ ✍️ یازان: #غلامرضا_گل‌نظری 🔷 «آوارس»ێن شفاهی تاریخی شاه قوْشونونون هجوموندان نئچه ایل کئچسه ده، هله ده آذربایجاندا آجلێـق باش آلێب گئدیردی . بیر گۆن جئیران باجێم گیلده‌یدیم. دئییردی:- بوگۆن قوْنشوموز شوکت خانێم بیزدن، اۇن بوْرج آلماغا گلمیشدی، دئییردی: «میرزا محمد بۆتون سارابێ وێریب بیربیرینه، نه بیر باتمان اون تاپێب، نه بوغدا!!» قارداش! بیزیم ده زومارێمیز قورتارماقدادێر. کندده هئچ اوْن باتمان اونوموز قالمایێب! دئییرلر، ارباب‌لار آرپا – بوغدانێ یێغیب، گؤندریبلر تهرانا! اؤلن اؤلۆب، قاچان قاچێب. بیر عدّه ده کی، دوستاقدادێر. بیلمیرم بو یازێـق ملّتدن نه ایسته‌ییرلر.دئدیم:- باجێ! سن غم یئمه. دئییرلر خیاودا بوْللوقدور! صاباح یوْلداشلارینان اوْردایێـق. صاباح بئش اوْن اۇلاغ، قاپێ – قوْنشودان بوْرج آلێب، یوْلا دۆشدوک.خیاودا هارا گئتدیک، بوغدا ساتان اوْلمادی هئچ، بئله دوْغرو – دۆزگون آرپا دا، تاپا بیلمه‌دیک! ناچار قالێب بیر آز چکیرتکه دڲمیش آرپا آلێب، یوْلا دۆشدوک.یوْل اۆستو مؤوول (موئیل) کندی مسجدینده، ناماز قێلیب، استراحت ائدیب، یئنه یوْللاندێـق. بیر آز گئدندن سوْنرا، گؤردۆک ائله بیل بیری، بیزی تعقیب ائدیر! دئدیک، شاید اوْ دا بیزیم کیمی مسافردی. اما بیز دایانان کیمی اوْ دا دایانێـردی! یوْلا دۆشنده، یئنه دالێمزجا گلیردی! «قاشقا بولاغا» کیمی بیزی تعقیب ائتمه‌سین گؤرۆب، یوْلداشلارا دئدیم:- سیز بونو سوْپاندینان داشا باسێن گؤره‌ک کیمدی؟سوْپاندلار ایشه دۆشدو. باشێـنا داش یاغان کیمی بیر داشێن دالێندا گیزلندی! من داشێن یان طرفیندن سرعتله قاچێب، اوْنو حاخلادێم توْپانچانێ دایادێم کلّه‌سینه و دئدیم:- اَده ظالیم بالاسێ! بیزدن نه ایسته‌ییرسن؟ نییه ایت کیمین دۆشوبسن دالێمیزا؟ یالوارماغا باشلادی:- «واللّه قوْناق، من اوْغرو دییلم. هیچ بیلمیرم ده سیزین دالێـنیزا نییه دۆشموشم! آنجاق اوشاقلارێم اۆچ گۆندور ائوده آجدێلار. اهل و عیال شرمنده‌سی‌یم.»بو سؤزلر، اۆره‌ڲیمه اوْد وێردی، دئدیم:- منیمله اولاغ‌لارین یانێـنا گل.«ممدعلی»‌یه دئدیم:- دستیرخانی آچ، اۆش دؤرت باتمان آرپا تؤک، وئر قوْی آپارسێن. بونو ائشیدن کیمی کؤینـڲین چێخاردیب، آشاغاسێن باغلایێب، دئدی:- «تؤکۆن بورا.»چیلپاق بدنینده ائشیڲه چێخان قابێـرقالار، اوْنون چوْخدان آجلێـق چکدیڲینی گؤستریردی.«ممد علی»یه دئدیم:- بیر ایکی باتمان دا آرتێـر.آرپانێ آلان کیمی آتدێ دالێـنا، اوشاق  کیمی شێللاق آتماغا باشلادێ:- «سیزه ده، ائششک‌لریزه ده قوربان اوْلوم. سالامات قالێن» - دئییب، اۆز آشاغا مێـزیریخلادی.غلامحسین دالێـسیجا باخا – باخا، منه دئدی:- «دایی اوْغلو! سن، آوارسا چاتێـنجا بو آرپانێ داغێـداجاقسان! آرواد – اوشاق آجدێ ها!! من، سنین یئرینه اوْلسایدیم، وار – یوْخون آلێب، گؤ.....نون قێـراغیندان دا بیر گۆلله وێراردیم کی، قانـقێلیجی یئریسین!»دئدیم:- بی‌بی اوْغلو! «یوْلوخدا نه وار کی، قێـریغا وئرسین!؟» گؤرمۆرسن آجلێـقدان «میلابێ تۆشوب ایچینه؟»بیر بولاغ یانێـندا یۆکلری اندیریب، بیرآز استراحت ائدیب، یوْلا دوام ائتدیک . «قره گؤله» چاتار – چاتماز، بئش آلتێ آتـلێ، الده بئش آچێلان، قاباغێمزی کسدیلر! قاباخداکی بوْز آتـلێ باغێردی:- الده نه وار توللایێـن یئره، اللریزی گؤڲـه قوْوزایێـن گلین قاباغا، یوْخسا آناز آغلار قالاجاق ها!»توْپانچا الده اؤزۆمو وئردیم بیر قره داشێن دالێـنا، یوْلداشلار دا هره‌سی بیر یاندا گیزلندیلر. #دوامێ_آشاغێـدا....👇 @SancaqDergisihttps://t.me/Sancaq_media/8363

■ 2815 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز چهارشنبه 28 مردادماه 1405🔹فایل pdf صفحات نشریه در لینک کانال تلگرام مهدتمدن⬇️t.me/mtnewspaper%F0%9F%8C%90 www.mtnews.ir🌐 www.asanews.ir☎️ 04135550663📳 09362822918🆔 @asanews

ٰ«#سانجاق»، سیاسی- اجتماعی مهدتمدن گۆنده‌لیگی‌نین ۲۸۱۵. سایینداکی تۆرکجه صفحه@SancaqDergisi🌐 instagram.com/sancaq2%F0%9F%8C%90 instagram.com/asanews.ir

🔷 کتاب تانێـتیمی⭕️ «بیر قادێـنین حیات یوْلو» کتابێ‌نین تانێـتدیرما بهانه‌سینه ✍️ یازان: #حسن_رشتبر **** 📚 کتابێـن آدی: بیر قادێـنین حیات یوْلو✍️ یازان: #اکبر_حمیدی (علیار)یکشنبه گـۆنو، مرداد آیی‌نێـن دوْقوزوندا، هر گۆنکی کیمی اسلامی شورا دفترینده چالێـشیردیم. دولت ارگانلارێـنا مکتوب یازماق و بو کیمی ایشلردن. «محمدجعفر رشتبر» ده (قارداش اوْغلوم) منیم یانێـمدایدی، او هردن گلیب، منیم حالێـمی یوْخلار. چوْخ مهریبان، ادبلی و معریفتلی بیر گنج‌دی. بیرآز گئچمیشدی قاپی دؤڲـۆلدو. بویورون دئمکله استاد دؤهتور «اکبر حمیدی» جنابلاری، بیزیم اوْفیسه گیرش یاپدی. آیاغا قالخێـب، اوْنونلا گـؤرۆشوب- خوش بئش ائلییندن سوْنرا، اوْتورماغێـنا دعوت ائدیب، بیر چای گتیردیم. او چایێـنی ایچندن سوْنرا، منه باخاراق دئدی: «اوْلسا، منه بیر دنه ده چای وئر چوْخ سوسوزام.» محمدجعفر گئدیب بیر چای داها گتیردی. استاد بوگۆن خاروانانێـن «یکشنبه بازار» آدلانان بازارێـندا باجێـسیله بیرلیکده دوْلاندێـقینان سوْنرا چوْخ سوسامێـشدی و بیز ده اوْنون چای ایسته‌مسینه بیرآز گۆلومسوندوک. چایدان سوْنرا احوالاتی، ایشلری‌نین نئجه قاباغا گئتمه‌سی و اؤزل‌لیکله یازێـچی‌لیق ایشلریندن سوْردوم. او دا سوْرولارێـمین هامێـسینی یانـێـتلادی و عمومیتله سؤز- صؤحبت کۆلتورل ایشلردن گئتدی. استاد اؤزۆیله بیر کتاب گتیرمیشدی، ماسانێـن اۆستونده ایدی، الینی اوزالدێـب، کتابی گـؤتـۆروب، منه طرف اوزالدێب، منه وئرمک ایسته‌دی. من ده کتابی الیندن آلاراق واراقلاماغا باشلادێـم. ائله بو گئدیشاتدا او بو کتاب حاقدا منه گئنیش معلومات وئردی. او دئدی: «بو کتاب «هئشتری» ماحالی‌نێن «تیلیمخان» کندیندن اوْلان بیر قادێـنین حیکایه‌سی دیر کی، من اوْنونلا یاخێـندان اوْتوروب دانێـشیب، بو کتابی رومان قالیبینده یازمێـشام، ماراقلی بیر کتابدی. بونو اوْخو، نظرینی بو کتاب حاقدا دئ.» من ده تئزلیکله بو کتابی اوْخویوب، اؤز دۆشونجه‌لریمی ایفاده ائده‌جڲـیمه سوز وئردیم. من کتاب اوْخوماق اۆچون چوْخ ماراقلێیام. نئچه گۆن ایدی اوْخوماغا کتابێـم یوْخ ایدی. بو گئچن آی عرضینده نئچه کتابی اوْخویوب- باشا وئرمیشدیم. ائله کتابسێـزلیقدان دا دارێـخیردیم. بو کتابین وئریلمه‌سی منی چوخ سئویندیردی. لاپ دوْغروسو، سئوینجیمی حؤرمتلی اکبر بڲـدن ده گیزلدنمه‌دیم. او گـۆن ناهاردان سوْنرا ائوه گئدیب، ناهار یئیه‌ندن سوْنرا کتابی اوْخوماغا باشلادێـم. چوْخ گـؤزل بیر کتاب ایدی! بو کتاب بیر قادێـنین حیات یـوْلو اوْلماغێـنا رَغماً، آذربایجانێـمیز و گـؤزل ایرانێـمیزین معاصر تاریخی و اوْنون داهی شخصیتلرینه تماماً وورقولانمێـشدی و اوْنلارین دا تاریخینه و حایاتلارێـنا شیرین یازێـیلا، اشاره ائتمیشدی. بو کتابی اوْخویان، آذربایجان و ایرانێـمیزن معاصر تاریخیندن، عادت- عنعنه‌لریندن، شهرلریندن، کندلریندن، تۆرک دیلی و ادبیاتی او جۆمله‌دن بایاتێـلار و مَثل‌لردن فایدالانماسێـندان امینم. بو کتاب تکجه بیر قادێـنین حایات یوْلونون شرحی دڲـیل، بلکه اوْنو، اجتماعی تاریخ و آذربایجان و ایرانێـن کـۆلتور و سیاسی تاریخی سایماق اوْلار. حؤرمتلی یازێچی، استاد اکبر حمیدی علیار جنابلاری، چوْخ ماراقلی و دقیق و روان یازماسێـیلا، هابئله 1302 دن بَری تاریخین دئتایلارێـندان یازماسی و بیر قادێـنین، سیاسی و کۆلتورل دۆشونجه‌لرینی، چکدیڲـی زحمت و مشقتلرینی چوْخ گؤزل صورتده شکیل‌لندیریب. بو کتابی اوْخوماقلا، سیز تیلیم‌خاندان باشلایاراق، مراغادان، بوکان‌دان، سوْیوق بولاقدان، اورمودان تبریزه قدر و اوْردان تهرانا، شیرازا و لوندونا قدر آغا خانێـملا یوْل‌بیر اوْلوب و اوْنون حکایه‌لری و باشێـنا گلدیکلرینی ائشیده‌جکسینیز. خوی و سلماس‌دا، ائرمنی‌لرین تؤرتدیکلری سوْی قێـریم، صمد بهرنگی‌نێـن اؤلۆمو ایله باغلی سؤزلر و بونون کیمی حادثه‌لر بو کتابدا جانلانێـر. آغاخانێـمین اوشاقلاری‌نێـن ساواک طرفیندن توتوقلانێـب دوستاغا دۆشمه‌لری و بیر چوْخ مسئله‌لر و مشقت‌لر کتابدا روایت اوْلونان قوْنولاردان‌دێر. گئچمیش شاه رژیمی‌نین دؤورونده آذربایجان قادێـنلاری‌نین باشلارێـنا گلدیکلری و «کشف حجاب» دئییلن مسئله‌لرده نَلر کی گـؤزل آذربایجانێـمیز و ایرانێـمیزین قادێـنلاری چکمه‌میشلر! منجه اکبر حمیدی جنابلای چوْخ دَرین و انسانی باخێـشلا، خالقێـمیز و اؤزل‌لیکله قادێـنلارین مشقتلرینه، دایاناجاقلارێـنا، کؤچمک‌لرینه و اۆمود بسله‌مکلرینه چوْخ دریندن باخێـب و یازێـب. منجه بو «دیزمار» ماحالی‌نێـن «خاروانا» بـؤلـۆمونون «علیار» کندی‌نین بـؤیـۆک شخصیتینی، آذربایجانێـن توْلستوی-و کیمی آدلاندێـرماق اوْلار. بو کتاب تکجه بیر کتاب دڲـیل بلکه بیر رسمی سند اوْلاراق خالقێـمیز اۆچون یازێـلیب. یاشاسێـن دیزمار.  @SancaqDergisihttps://t.me/Sancaq_media/8361

■ 2814 مین شماره روزنامه سیاسی واجتماعی مهدتمدن در 8 صفحه به زبان‌های ترکی و فارسی روز سه‌شنبه 27 مردادماه 1405🔹فایل pdf صفحات نشریه در لینک کانال تلگرام مهدتمدن⬇️t.me/mtnewspaper%F0%9F%8C%90 www.mtnews.ir🌐 www.asanews.ir☎️ 04135550663📳 09362822918🆔 @asanews